Për ne
Fondacioni i Kosovës për Shoqëri të Hapur, i themeluar në shtator të vitit 1999, është pjesë e Fondacioneve për Shoqëri të Hapur - rrjet i fondacioneve filantropike dhe donatori më i madh privat i grupeve të pavarura që janë të angazhuara për drejtësi, qeverisje demokratike dhe drejtat e njeriut.
Historia jonë
Fondacionet e Shoqërisë së Hapur, të themeluar nga George Soros, janë donatori më i madh privat i grupeve të pavarura që janë të angazhuara për drejtësi, qeverisje demokratike dhe drejtat e njeriut. George Soros themeloi fondacionin e tij të parë ndërkombëtar në Hungari në vitin 1984. Sot, Fondacionet për Shoqëri të Hapur operojnë në më shumë se 120 vende të botës, duke dhënë mijëra grante çdo vit përmes një rrjeti të fondacioneve dhe zyreve nacionale dhe rajonale.
Fondacionet për Shoqëri të Hapur e filluan punën e tyre në Kosovë në vitin 1991 si pjesë e Fondacionit Soros për Jugosllavi. Në vitin 1993, një degë e fondacionit u hap në Prishtinë. Konteksti në të cilin fondacioni operonte atëherë - një Kosovë e segreguar ku shqiptarët ishin larguar nga sektori publik dhe kishin organizuar institucione paralele publike - ishte edhe vendimmarëse në çfarë pune do të bënte fondacioni. Zyrja në Prishtinë furnizonte shkollat me materiale dhe trajnonte edukatorët, e në të njëjtën kohë organizoi edhe përkthimin dhe botimin e librave.
Fondacioni i Kosovës për Shoqëri të Hapur u regjistrua si organizatë e pavarur në shtator të vitit 1999, disa muaj pas përfundimit të luftës në Kosovë. Arsimi ishte prioritet kyç pas luftës: së bashku me donatorët tjerë Fondacioni furnizoi nxënësit kosovar më 6.2 milionë libra shkollorë. Ndaras, Fondacioni themeloi qendra trajnimi dhe filloi të ndante bursa për kosovarët të studionin jashtë vendit.
Në vitet që pasuan, Fondacioni u angazhua gjithnjë e më shumë në politikëbërjen lokale duke ndërtuar partneritete dhe aleanca për të avokuar për çështje që ishin të rëndësishme për proceset shtet-ndërtuese para dhe pas shpalljes së pavarësisë. Prej ditëve të para, Fondacioni ishte i angazhuar në prodhimin e raporteve të politikave që mbulonin çështje prej energjetikës e ambientit, e deri tek reforma e qeverisjes lokale, prokurimit, shëndetit publik dhe përfshirjes së minoriteteve.
KFOS po ashtu dedikoi shumë angazhim në integrimin e komuniteteve Rome, Ashkali dhe Egjiptiane duke u bërë bashkë me OSBE-në për të përpiluar strategjinë për integrimin e komuniteteve RAE dhe për të mbështetur aplikacionin e Kosovës për Dekadën e Romave.
Sot, KFOS punon në luftimin e korrupsionit dhe rritjen e transparencës në sektorin publik, ndihmon institucionet e Kosovës për të përqafuar politikat dhe standardet evropiane, përkrahë integrimin e serbëve të Kosovës dhe minoriteteve tjera në shoqërinë kosovare dhe ndihmon aleanca të udhëhequra nga studentët për të luftuar pandëshkueshmërinë dhe korrupsionin në arsimin e lartë.
Për më shumë informata për programet tona aktuale shiko:
George Soros
George Soros është themeluesi dhe Kryesuesi i Fondacioneve për Shoqëri të Hapur.
Vet Soros ka përjetuar diskriminim etnik dhe politik. I lindur në Hungari në vitin 1930, ai jetoi gjatë okupimit nazist 1944-1945, gjatë të cilit mbi 500,000 hebrenjë hungarez u vranë. Vet familja e tij hebrenje mbijetoi okupimin duke siguruar dokumente të falsifikuara të identifikimit, duke e fshehur prejardhjen e tyre, dhe duke i ndihmuar të tjerëve të bënin të njëjtën gjë. Soros më vonë kujtoi këtë përvojë “që jo vetëm arritëm të mbijetonim, por arritëm t’i ndihmojmë edhe tjerëve.”
Pas luftës, derisa komunistët po konsolidonin pushtetin në Hungari, Sorosi e la Budapestin në vitin 1947 dhe u zhvendos në Londër, dukë punuar me gjysmë-orar si portier në hekurudha dhe si kamarier në klube nate për të paguar studimet e tij në London School of Economics. Në vitin 1956, ai emigroi për në Shtetet e Bashkuara të Amerikës, dhe u fut në botën e financës dhe investimeve ku edhe e fitoi pasurinë e tij. Në vitin 1970, ai e themeloi fondin e vet të financave, përmes të cilit u bë një nga investitorët më të suksesshem në historinë e Shteteve të Bashkuara të Amerikës.
George Soros e përdori pasurinë e vet për të krijuar Fondacionet për Shoqëri të Hapur - një rrjet i fondacioneve, partnerëve dhe projekteve aktive në më shumë se 120 vende. Emri dhe puna jonë reflektojnë influencën e filozofisë së Karl Popperit në vet mendimin e Sorosit, i cili e kishte hasur punën dhe mendimin e Popperit në LSE. Në librin e tij Open Society and Its Enemies, Popper argumenton se asnjë filozofi apo ideologji nuk është arbitri i fundit i të vërtetës, dhe se shoqëritë mund të lulëzojnë vetëm kur bëjnë hapësirë për qeverisje demokratike, liri të shprehjes dhe respekt për të drejta individuale – një qasje që qëndron si gurthemel i punës sonë në Fondacionet për Shoqëri të Hapur.
George Soros e filloi punën e tij filantropike në vitin 1979, duke dhënë bursa për afrikanët jugor të zi që jetonin në aparteid. Gjatë viteve të ‘80ta, Soros ndihmoi të promovonte një shkëmbim të hapur idesh në Hungarinë komuniste duke financuar vizita akademike për në perëndim dhe duke përkrahur grupet e reja të pavarura kulturore, si dhe individë. Pas rënies së Murit të Berlinit, ai e themeloi Central European University si një hapësirë që do të nxitte mendimin kritik– një koncept që në atë kohë ishte i huaj për shumicën e universiteteve në ish-bllokun komunist.
Pas përfundimit të Luftës së Ftohtë, ai gradualisht e zgjeroi aktivitetin e tij filantropik në Afrikë, Azi, Amerikë Latine dhe SHBA, duke përkrahur një gamë të gjërë të angazhimeve për të krijuar shoqëri më llogaridhënëse, transparente dhe demokratike. Soros ishte njëri nga zërat e hershëm prominent që kritikuan luftën kundër drogës si “diçka që mund të thuhej është më e dëmshme se vet problemi,” dhe ndihmoi që të nisej lëvizja për marihuanën si medikament në Amerikë. Në vitet e hershme të 2000ta, Soros u bë përkrahës vokal i lëvizjes për martesën në mes gjinisë së njëjtë. Ndonëse kauzat me të cilat merret kanë evoluuar gjatë viteve, të gjitha ndërlidhen afër me idealet e tij për një shoqëri të hapur.
Misioni
Rrjeti jonë global i fondacioneve beson që zgjidhjet për çështje globale kërkojnë një shkëmbim të lirë të ideve dhe mendimeve – një gurthemel i një shoqërie të hapur. Si fondacion nacional, KFOS e ka marrë përsiper misionin për të promovuar principet e shoqërisë së hapur në angazhimin tonë për zgjidhur sfida nacionale e rajonale me të cilat përballet shoqëria jonë.
Përderisa puna jonë ka ndryshuar përgjatë viteve, misioni jonë thelbësor ka mbetë i njëjtë: ne jemi të përkushtuar për të ndërtuar një shoqëri gjithpërfshirëse me bazament në drejta të njeriut dhe sundim të ligjit, dhe për të inkurajuar qeverisje transparente dhe llogaridhënëse.
Si rezultat, misioni ynë na ka drejtuar të punojmë në një diapazon të gjerë fushash, duke përfshirë arsimin, energjetikën, qeverisjen lokale, të drejtat e minoriteteve, artin, shëndetin mendor, anti-korrupsionin dhe integrimet evropiane.